Gjatë takimit me socialistë të Vlorës, kryeministri Edi Rama vijoi replikat me kundërshtarët e ndërtimit të resortit në Zvërnec, duke i akuzuar ata se po ushqejnë narrativa të rreme për shitjen e Shqipërisë dhe pronave publike.
Kreu i qeverisë u shpreh se Shqipëria ëshë dëmtuar rëndë në të kaluarën nga mënyra se si janë trajtuar çështjet e pronësisë.
“Shqipëria është dhunuar shumë përpara se të më jepnit besimin për të drejtuar Partinë Socialiste. Shqipëria është dhunuar kur nxorën titujt e pronësisë nga kutitë metalike ku ruheshin dhe erdhën ca shqiptarë të çoroditur të viteve 1991-1992, që i bënë fije-fije letrat e pronarëve”, tha ai.
Duke iu referuar debatit për ishullin e Sazanit, kryeministri mohoi akuzat për privatizimin e tij dhe tha se projekti i zhvillimit turistik do të respektojë pronësinë shtetërore mbi territorin.
“Po të ishim ne ata që shisnim Shqipërinë, do të ishte privatizuar Sazani. Sazanin kanë dashur dhe më parë ta bëjnë destinacion turistik edhe udhëheqës të tjerë, por ne nuk po bëjmë atë që bënë të tjerët, që ofruan Sazanin për ta privatizuar”, deklaroi Rama.
Sipas tij, edhe pse investitorët e interesuar për zhvillimin e Sazanit janë më të fuqishëm financiarisht se ata që janë interesuar më parë, qeveria ka vendosur një vijë të kuqe të qartë.
“U kemi thënë se Sazani është tokë dhe pronë e shtetit shqiptar”, u shpreh kryeministri.
Me heret, Kryeministri Edi Rama teksa po diskutonte me një prej banorëve të Zvërnecit, që pretendon se është pronar në tokën ku do të ndërtohet resorti turistik, kishte një koment edhe për protestuesit që kundërshtojnë projektin.
Rama tha se ‘protestuesit kanë dalë t’ju mbrojnë juve nga unë’, teksa nga ana tjetër, qytetari tha se i mbështeste investimet në turizëm dhe zhvillimin e vendit.
“Në Tivat, të gjithë ata që takova unë atje, të gjithë punëtorët, ishin malazez. Ka lezet, marrin rrogën tamam. Marrin sigurime shoqërore. Tha një djalë atje ‘ku të shkoj unë? Pse të iki në Dubai apo Abu Dhabi të punoj kamarier?’ ‘Unë këtu e kam pagën fiks dhe jam në shtëpinë time’ më tha. Pastaj ai nuk është një investim thjeshtë hajde se do bëjmë shtëpi e vila e do mbyllemi. Ai program ka spital, ka shkollë turizmi, ka plotë e plotë gjëra të tjera. Tani kur të dalin të thonë anuloje një gjë që nuk është bërë akoma, t’i s’ke më çfarë bën pastaj. Do të dëgjoni lloj lloj çudirash. Këtu është mbushur bulevardi me njerëz që kërkojnë t’ju mbrojnë juve nga unë. Ti s’ke dalë, sepse ti je njeri normal, që thua kjo është prona ime dhe unë do e fitoj me gjykatë. Ata atje kanë dalë të flasin me emrin tënd, kupton ti tani”, tha Rama.
“Nuk jam kundër turizmit dhë zhvillimit. Duke qenë se kam punuar 20 vite mësues, pastaj e ndërrova komplet sistemin e punës edhe kalova kalorës, bëj disa shëtitje me kuaj. Ka të bëjë me turizmin. Vështirësinë e nisa te tokat e tim gjyshi. Ishte pak e vështirë. Vajta pak në Zvërnec, te Geroni aty afër. Tani jam diku më lart, te Qafa e Topit. Në të tre vendet që kam qenë, problemi i vetëm ka qenë prona. 30 vite toka e pamenaxhuar. 30 vite toka e pamenaxhuar. Si mund të zhvillohet turizmi rretheqark gjithë Vlorës?”, tha qytetari Gentian Moçka.
Më tej kryeministri Rama, teksa përmendi sulmet kibernetike nga Irani ndaj vendit tonë, tha se ka pasur një aktivitet të shtuar të përdoruesve të rrjeteve sociale shqiptare (apo të atyre që lidheshin me Shqipërinë).
“Dihet botërisht që ne jemi shënjestër e sulmeve kibernetike të Iranit. Dhe për këtë arsye ne kemi ndërtuar një sistem mbrojtje që është ndër më të mirët në Europë, përsa i përket sulmeve që godasin infrastrukturën dixhitale. Por kemi mundësi edhe të shohim aktivitetin. Ditën e parë kur ka shpërthyer gjëja, ka pasur 5 herë më shumë përdorues të rrjeteve shqiptare, të rrjeteve sociale që lidheshin me Shqipërinë, sesa ç’ka pasur gjatë gjithë viteve të fundit. 5 herë më shumë u bënë në një ditë, kur u shpërnda ajo gjëja”, tha mes të tjerash Rama.
