Zyra e shtypit e Partisë Demokratike ka dalë sot me një njoftim mbi takimin që ka zhvilluar ditën e hënë ish kryeministri Sali Berisha me aleatët, krerë të partive jo parlamentare.
Në mesazhin e tij, Berisha ka theksuar me aleatët se duhet “të krijojmë një front të gjerë të kauzave të shtypura dhe referendumet si mekanizëm shpëtimtar për vendin”.
“Konsideroj shumë të rëndësishme, një bashkërendim të plotë të të gjitha përpjekjeve tona në çdo aspekt. Në përzgjedhjen e kandidatëve. Në përpjekjet për një proces zgjedhor integral. Në përpjekje për të hapur rrugën për referendume. Ne duhet të bëjmë gjithçka për të hapur rrugën e referendumeve. Duhet të bëjmë një kauzë shumë të madhe bashkërisht. Keni shumë të drejtë për reformën territoriale, por kjo është një gjë në letër sepse Edi Rama nuk pranon asnjë. Edi Rama kishte bërë një pazar me Lulzim Bashën, më voto Vettingun se po të shtoj 4-6 bashki. Dhe tani që Basha nuk ka asgjë në dorë, ju garantoj se nuk e lëviz numrin e bashkive. Nuk e lëviz dhe e vërteta është se janë disa ndryshime të thella që ne duhet të synojmë për t’i hapur rrugën referendumit, bashkërisht. Me referendume ne mund të sjellim ato reforma që janë shpëtimtare për Shqipërinë. Përndryshe vështirësitë janë shumë të mëdha”, është shprehur Berisha para aleatëve të cilët kanë thënë se shqiptarët presin protesta, ose do të largohen nga vendi pasi nuk shohin më shpresë.
Sipas PD, Berisha shprehu bindjen se protestat janë jetike dhe si të tilla janë në rendin e ditës dhe do të përshpejtohen bashkërisht.
