Gjithmonë ka nga një histori konspiracioni në Federatën Shqiptare të Futbollit, duke e kthyer institucionin në një ndërmarrje shumë të dyshimtë. Dje u publikua lajmi, sipas të cilit është shkarkuar Redi Jupi nga drejtimi i ekipit përfaqësues Shpresa. Dhe megjithëse flitet për një njeri që mbulonte një prej posteve më të rëndësishme në FSHF, për 24 orë nuk erdhi asnjë deklaratë zyrtare, përveçse u hodhën në terren gazetarët e oborrit, sipas të cilëve ishte thjeshtë një dorëheqje. Ky variant tashmë është hedhur poshtë nga ish-trajneri Jupi, por ajo që të bën përshtypje është, se si është sabotuar sistematikisht gjatë të gjithë kësaj periudhe një nga njerëzit e afërt të predidentit Duka. Shpresës së tij, që duhet thënë se mund të ishte një nga skuadrat më kompetitive të të gjtiha kohërave ia hoqën mundësinë për të konkuruar, aq sa çuditën edhe më naivët. Sa herë që Jupi me të tijët kishte ndeshje shumë të rëndësishme, siç ishte rasti me Greqinë dhe Izraelin, trajneri De Biazi ndërhynte energjikisht, duke i marrë futbollistët kryesorë, të cilët vetëm sa i largonte nga përfaqësuesja numër dy, pasi nuk i përdorte. Në Izrael u mundëm 4-0, por FSHF që nuk kursehet për Kombëtaren kishte sajuar një intinerar sfilitës për talentët tanë të rinj, ndërkohë që Latifi e Grezda nuk u lejuan të udhëtonin, por në të njëjtën kohë nuk u përdorën qoftë edhe një minutë as kundër Lihtenshteinit. Ndërsa tani nuk marrin mundimin as të informojnë publikun, megjithëse Redi Jupi konsiderohej si një prej skautëve më të mirë për zbulimin e futbollistëve të perspektivës.
