Edhe pse lidhja 5G nuk është ende e përhapur në të gjithë globin, testet për 6G, standardin e së ardhmes, kanë nisur. Lidhja 6G premton të sigurojë shpejtësi më të madhe dhe të lehtësojë vazhdimësinë midis botës fizike dhe dixhitale për kryerjen e shumë prej aktiviteteve tona, duke përfshirë në metaverse. Më pas, inteligjenca artificiale do të luajë një rol në mbledhjen dhe përpunimin e të dhënave.
Sot, 5G mund të arrijë një maksimum prej 2 giga për sekondë. Për lidhjen e gjeneratës së gjashtë po flasim për 1000 giga në sekondë, pra 1 terabajt.
Për këtë arsye, ardhja e 6G përkufizohet edhe si kalimi nga ekonomia giga në tera. Diskutimet për standardizimin e rrjetit 6G pritet të fillojnë rreth vitit 2025 ndërsa komercializimi i teknologjisë është planifikuar për vitin 2029.
Krahasuar me rrjetet 5G, protokolli jo vetëm që do të sigurojë shpejtësi më të mira të të dhënave, por edhe vonesë më të ulët dhe besueshmëri më të madhe.
Testet në 6G tashmë kanë filluar nga realitete të ndryshme. Ditët e fundit, LG në bashkëpunim me institutin ‘’Fraunhofer Heinrich Hertz’’ dhe ‘’Fraunhofer për Fizikën e Aplikuar të Gjendjes së Ngurtë’’ ka arritur një moment historik: ka demonstruar mundësinë e transmetimit të të dhënave në brezin midis 155 dhe 175 GHz deri në një distancë prej 320 metrash, duke mposhtur rekordin e tij të mëparshëm prej 100 metrash.
Ky është një hap i rëndësishëm drejt testimit të 6G në mjedise reale, duke qenë se objektivi i deklaruar i standardit është të jetë në gjendje të shfrytëzojë qelizat e afta për të mbuluar, secila, një rreze prej 250 metrash për të ofruar shpejtësi lidhjeje në teori prej 1000 giga për sekondë, pra 1 terabajt.
