Ekspozita me 24 fotografi nga Shkodra e viteve 1935-1989
Shkodra e 80 viteve vjen përmes 24 fotografive bardh’ e zi. Janë fotografi amatore që nga viti 1935 e deri në vitin 1989. Por, në mes tyre ka edhe fotografi nga ikona e fotografisë shqiptare, Gegë Marubi.
24 fotografitë janë përzgjedhur nga konkursi i shpallur nga Organizata GO2 në gusht të këtij viti. Në konkurs morën pjesë 26 konkurrentë, të cilët paraqitën 66 fotografi bardh’ e zi, të realizuara para vitit 1990.
Këto fotografi u paraqitën mbrëmë për herë të parë publikun shkodran, në një ekspozitë me temë biçikletën.
“Shkodra, familja ime, biçikleta ime, historia ime” titullohej ekspozita e organizuar nga GO2 që u hap dje në Muzeun Historik të Qytetit dhe do të qëndrojë deri me 2 Nëntor, për t’u zhvendosur më pas edhe në Tiranë.
Në fjalën e hapjes, organizatorja Eltjana Shkreli nderoi me një minutë heshtje një nga pedaluesit më të njohur shkodranë, ish-deputetin e PD, Gilman Bakallin, i cili u nda nga jeta para pak ditësh, ndërsa në shenjë homazhi, portreti i tij ishte e vetmja fotografi me ngjyra në ekspozitë.
Ekspozita dhe promovimi i albumit “Shkodra, familja ime, biçikleta ime, historia ime”, përmbylli Ditën e Biçikletave, të organizuar nga Bashkia Shkodër, Organizata për Lëvizje të Qëndrueshme Urbane GO2, si dhe OJF The Door.
