Kryedemokrati Lulzim Basha ka sfiduar kryeministrin Edi Rama duke i kërkuar të botojë fashikullin e çështjes së tij për “Toyota Yaris”. Duke iu përgjigjur Ramës, Basha tha se e di mirë se çfarë ka thënë duke e akuzuar se kontrollon SPAK. Ai i kërkoi më tej kryeministrit t’iu thotë shqiptarëve se me çfarë morali iu kërkon deputetëve të ngrenë dorën për të rritur borxhin.
“Më drejtohet mua më thotë pse nuk shkon ti në Belgjikë, shko në SPAK dhe merr fotokopjen e dëshmisë sime në prani të prokurorëve, prokurorit belg e autoriteteve shqiptare për ‘Toyota Yaris’. Se ti e di fare mirë, ti ndal çështje penale. Fashikullin e çështjes sime e ke prej një viti, merre botoje, po ta kisha unë do e botoja. Lëri gënjeshtrat, mos u fshih tek dhoma e miellit, por thuaju shqiptarëve se me çfarë morali vjen këtu dhe iu kërkon deputetëve të tu të ngrenë dorën për të rritur dhe njëherë borxhin pa iu kthyer shqiptarëve asgjë mbrapsht. Ky është thelbi, është e vërteta. Hallet e shqiptarëve janë shqetësimi ynë. Zgjedhja e këtyre halleve fillon me largimin e sojit tënd nga politika. Duke qenë se mekanizmin e votës e ke bllokuar, voto vettingun në politikë. Kjo sallë kurrë më nuk do t’i takojë duarve të mpira që ngrihen për të shtuar taksat, borxhin, për të vjedhur shqiptarët”, tha Basha.
Kreu i PD deklaroi se Rama ka marrë më shumë borxh se të gjitha qeveritë nga 1991. “Borxhin e ka marrë ne emër të shqiptarëve. Ka vënë hipotekë të ardhmen e fëmijëve të shqiptarëve. Nuk ka vënë hipotekë sarajet në Surrel”, tha Basha.
