“Mirëpresim miratimin e Projekt-Amendamenteve Kushtetuese nga Komisioni i Reformës në Drejtësi”
“Një vote për këtë reformë është një vote në favor të lëvizjes së Shqipërisë përpara në rrugën e saj drejt integrimit në BE dhe një të ardhmeje më të fortë euro-atlantike”, thekson sot ambasada e Shteteve të Bashkuara të Amerikës. Deklarata e SHBA-së vjen pak çaste pas miratimit të reformës nga mazhoranca në komisionin e reformës në drejtësi. SHBA e përshëndeti këtë hap të miratimit të reformës duke I bërë thirrje palëve që të gjejnë dialogun për çështjen e vetme të mbetur pa marëveshje në këtë draft reforme. Deklarata e SHBA-së është e qartë dhe fton opozitën por edhe mazhorancën të gjejnë gjuhën për ta votuar përfundimisht dhe sa më shpejt këtë reform.
Deklarata
“Shtetet e Bashkuara mirëpresin miratimin e projekt-amendamenteve kushtetuese nga Komisioni i Posaçëm për Reformën në Drejtësi i Parlamentit të Shqipërisë. Ky është një hap i rëndësishëm për të shtruar rrugën e miratimit të plotë të një reforme të thellë dhe domethënëse të sistemit të drejtësisë të Shqipërisë. Paketa e projekt-amendamenteve ka mbështetjen e plotë të Shteteve të Bashkuara dhe Bashkimit Europian. Nxisim dialogun midis qeverisë dhe opozitës për të zgjidhur çështjen e fundit të mbetur për të cilën kanë mosmarrëveshje dhe nxisim të gjithë anëtarët e parlamentit të votojnë në favor të kësaj reforme. Një vote për këtë reformë është një vote në favor të lëvizjes së Shqipërisë përpara në rrugën e saj drejt integrimit në BE dhe një të ardhmeje më të fortë euro-atlantike.
