Nga Erl Kodra
Kur baballarët tanë u mundën nga terroristi Enver Hoxha, shumica absolute e shqiptarëve të sotëm nuk ishin në këtë botë. At’kohë, shoqëria shqiptare nuk ishte komuniste, por, ata (shqiptarët) e lejuan atë beterr të masakronte një shtresë shoqërisë tonë, duke u marrë pronën, jetën dhe dinjitetin. Bota e atyre viteve e ndarë me një perde të hekurt nuk ishte mjaftueshëm e vëmendëshme për të shpëtuar shqiptarët.
Sot, Edi Rama ekzekutoi provën gjenerale të vendosjes së një lloj diktature të re; Shtetin e Mafias.
Shqiptarët, të shpërndarë anembanë botës e ndoqën në kohë reale se çka po ndodhë me Atdheun e tyre. Shumë njerëz e ndjejnë se diçka e rëndë po ekzekutohet ndërkohë; Mafia zyrtarizoi pushtetin e vet politik.
Ky është një moment kruçial për të reaguar në kohë, para se shoqëria të zhytet përfundimisht në një diktaturë të errët dhe të dhunshme. Ndonjëherë, koha e duhur vlen një epokë. Dhe ky është rasti që nuk duhet humbur.
Situatën politike në Shqipëri të gjithë e njohim. Pushteti i Edi Ramës shkatërroi të gjitha institucionet e shtetit ligjor, ndërsa Partisë Demokratike i ka mbetur veçse emri. Në të vërtetë, shqiptarët nuk kanë më asnjë mbrojtje, ligjore dhe institucionale, politike ose ndërkombëtare.
Fati ynë gjendet brenda nesh.
Partia Demokratike ka edhe një shans të fundit para se të braktiset masivisht nga shqiptarët. Tek e fundit, ata i mbijetuan ferrit komunist, dhe mund t’ia dalin mbijetesës edhe pa Partinë Demokratike. Nëse ajo e humbë edhe këtë tren, ne mund të themi; na ishte njëherë Partia Demokratike e Shqipërisë.
Dikush duhet të marrë përgjegjësinë që t’i dalë zot fateve të demokracisë. Shqiptarët nuk e meritojnë braktisjen brutale për kalkulime politike.
Edhe për Lulzim Bashën është shansi i fundit. Domethënë edhe disa orë; të dalë dhe të bëj atë që duhet bërë.
