Ende janë të freskëta pamjet e dhunës që shpërtheu në stadiumin e Beogradit, që dolën jashtë kontrollit në përfundim të pjesës së parë të ndeshjes Serbi – Shqipëri, luajtur në kuadër të eleminatoreve të europianit “Francë 2016”. Atë mbrëmje ndodhi gjithçka, përveçse nuk pati viktima, pasi edhe stadium ishte i populluar vetëm me tifozë vendas.
Ndërkohë sot, UEFA ka shmangur një tjetër ndeshje që mund të sillte përplasje të ngjashme, pasi shorti i “Euro 2019” për përfaqësueset U-19, vuri në të njëjtin grup Kosovën dhe Serbinë. Por skuadrat mbetën në Grupin 6 vetëm disa sekonda, në tavolinën e shortit në Nion, pasi menjëherë, organizatorët e zhvendosën Serbinë në Grupin 7. Gjithçka ishte përcaktuar që më parë, kur Komiteti Ekzekutiv i UEFA-s kishte vendosur paraprakisht, që Kosova të mos ishte në një grup me Serbinë, por as me Bosnjën.
