Për Sebino Plakun nuk ishte aspak i gjetur ai nervozizëm ekstrem, pas një deklarate fare të zakonshme të trajnerit të Skënderbeut, Mirel Josa. Sot që në mëngjes, presidenti Takaj e ka pezulluar pa afat futbollistin dhe askush nuk kishte si të pretendonte, që titullari i pesë herë kampionëve do të mbante tjetër anë. Madje sipas informacioneve, Plaku nuk është lejuar as të stërvitej i diferencuar nga grupi në ditën e parë të përgatitjeve, në kuadër të një jave shumë të ngjeshur. Sulmuesi, dikur edhe ai kampion me korçarët, e ka quajtur jo profesional deklarimin e trajnerit, sipas të cilit Plaku është një alternativë. Por ndoshta lojtari duhet të vazhdonte të priste shansin e tij, pasi duket e palogjikshme që në këtë pjesë të rëndësishme të kampionatit dyshja sulmuese Sukaj-Xhejms të prishet, aq më shumë që në pritje është edhe braziliani Renatinjo, një blerje që në janar u konsiderua e madhe. Plaku e ka filluar kampionatin tek Partizani, ndërkohë që deri në verë nuk ka më merkato për të gjetur një skuadër të re, ndërsa rolin e titullarit në Skënderbeun e Josës tashmë e ka humbur edhe kapiteni Shkëmbi, një futbollist i konsideruar i paprekshëm.
