Zëvendëskryeministri dhe ministri i brendshëm i Italisë, Matteo Salvini, ka braktisur tryezën e bisedimeve në Helsinki pas një grindjeje me ministrat gjermanë e francezë.
Grindja nisi pas kërkesë së bërë nga Salvini dhe Malta për ndryshimin e rregullave mbi portin e parë të sigurt, në lidhje me pritjen e emigrantëve nga Afrika.
“SeaWatch3 ka shkelur ligjet italiane dhe goditi një motovedetë”, tha Salvini, i cili u konfrontua ashpër sot në mëngjes me ministrat e brendshëm të Maltës, Gjermanisë e Francës.
Salvini, pas grindjes në tryezën e Helsinkit, ka ftuar Francën, Gjermaninë e Maltën në një takim tjetër në shtator për të diskutuar sërish mbi rregullat e imigracionit. Gjatë takimit të Helsinkit, pas një përballjeje me teknikët, ministrat dialoguan më vete në përpjekje për të gjetur gjuhën e përbashkët.
Salvini këmbënguli për rritjen e impenjimit për parandalimin e nisjeve e për të rritur numrin e dëbimeve, edhe duke krijuar një listë vendesh të sigurta, “pasi tjetër gjë janë të ardhurit nga zonat e luftës dhe tjetër gjë janë të ardhurit nga Tunizia e Shqipëria”.
