Rreth orës 17:30 të ditës së shtunë më 9 prill, kur ishte duke u mbyllur procesi i votimeve për referendumin e PS-së, nisën të shfaqen shifrat e para me rezultate në disa qytete. Për shembull në Lezhë, rreth orës 18: 00 ishte mbyllur procesi i votimit dhe numërimit dhe rezultati ishte 1468 pro kryetarit Rama dhe 43 kundër. Në Krujë kishte përfunduar gjithashtu votimi dhe ishin 126 anëtarë pro Ramës dhe 21 kundër.
Në njësinë numër 1 në Tiranë kishin votuar 501 socialistë, nga të cilët 383 kishin votuar pro rikonfirmimit të Ramës në krye të PS-së, ndërsa 118 kundër. Pak minuta më pas rezultatet nisën të jepen me përqindje.
Kështu, në Mallakastër u raportua rreth orës 19.00 shifra mbi 90% pjesëmarrje dhe mbi 95% fitore e Ramës në këtë referendum. U publikuan shifra në përqindje edhe për rrethe të tjera.
Duket se pati një vendim të mos bëhen më publike shifra anëtarësh në numër, por vetëm në përqindje.
Deputeti Ben Blushi ka kërkuar nga Komisioni i Zgjedhjeve në PS materialet zgjedhore, ku përfshihet edhe numri i socialistëve që morën pjesë në votime në referendumin e 9 prillit. Komisioni i Zgjedhjeve, ka refuzuar kërkesën e deputetit me të vetmin argument se procesi është në rregull dhe nuk ka asrye të ndajmë dokumentet zgjedhore me ju.
Por, ky refuzim i institucionit të zgjedhjeve në PS për njërin prej deputetëve të kësaj partie, i jep të gjithë të drejtën skeptikëve të dyshojnë se procesi i votimit dhe numërimit të votave është manipuluar.
Nuk ka dyshime se Rama ka fituar përballë Blushit, por dyshimet janë tjetërkund.
A i ka marrë Rama votat e mbi 50% të anëtarësisë së PS-së?!
Deri sa të dalë një dokument zyrtar nga Komisioni i Zgjedhjeve në PS, kjo pyetje vë në dyshim seriozisht rezultatin 95% të socialistëve.
Kur një institucion merr përsipër të menaxhojë një proces zgjedhor, ka si detyrim transparencën pikërsëpari të numrit të pjesëmarrësve në votime. Ky detyrim vlen edhe për Komisionin e Zgjedhjeve në PS, madje kjo është e sanksionuar edhe në statutin e tyre.
Deri tani nuk dihet numri i socialistëve që morën pjesë në referendum, ku ata pyeteshin: “Kur Partia Socialiste është në qeveri dhe kryetari është zgjedhur kryeministër, a konsiderohet automatikisht i rinovuar mandati i kryetarit?
