Konsumi i energjisë elektrike është rritur me 10 për qind ditët e fundit, për 24 mijë megaWat/orë energjie në ditë, nga rreth 22.230 megaWat/orë që ishin në ditët e para të janarit. Ndërsa krahasuar me mesataren e dhjetorit, rritja është edhe më e madhe.
“Kemi një rritje të ditëve të fundit me rreth 10 për qind të ngarkesës së parashikuar, ose 1.500-1.600 megaWat/orë në ditë, ndërkohë që ka një rritje shumë më të madhe në krahasim me dhjetorin e vitit 2016, që është në nivelet e 3.000 megaWat/orë në ditë”, tha Elton Sevrani, drejtor i Tregut të Energjisë, OSHEE.
Ndërkohë ministri i Energjisë, Damian Gjiknuri, dhe administratori i OSHEE-së, Adrian Çela, ishin në Kukës, ku inspektuan nënstacionin në Rexhepaj. Për Gjiknurin, avaritë janë riparuar në kohë rekord. Për gatishmërinë dhe punën e bërë, rreth 1.800 punonjës të OSHEE-së do të marrin shpërblim nga kompania.
OSHEE garanton furnizimin me energji elektrike pa ndërprerje. Importet janë siguruar për të gjithë periudhën e janarit dhe, në koordinimin me prodhimin vendas, do të lëvrohen edhe sasitë e energjisë nga jashtë.
