Qeveria e drejtuar nga Dritan Abazoviç në Mal të Zi duket se fatin tashmë e ka përcaktuar, ndërkohë që përballet me votëbesimin në Parlament. Këtë e pohoi vetë kryeministri me origjinë shqiptare. Abazoviç tha se karteli i drogës dhe kontrabandistët e cigareve komandojnë për 30 vite Malin e Zi.
“Është e lehtë për mua të qëndroj para jush sot këtu. Si ka qenë sektori i sigurisë gjatë kohës suaj në pushtet? Udhëheqës i sektorit për luftën kundër krimit të organizuar ka qenë Zoran Lazoviç, emër shumë i rëndësishëm për seancën e sotme. Drejtues i agjencisë së inteligjencës ka qenë Milivoje Katniç, emër shumë i rëndësishëm për seancën e sotme. Qeveria do të bjerë, por sot do të prezantohen disa fakte, që të shihni se si krimi i organizuar, karteli i drogës dhe kontrabandistët e cigareve komandojnë këtë vend për 30 vjet” – deklaroi Abazoviç në Parlamentin e Podgoricës.
Kryeministri shigjetoi opozitën ku tha se kërcënoi nëse nënshkruhet Traktati Themelor do të rrëzohej Qeveria.
“Ju kërcënuat se nëse nënshkruhet Traktati Themelor do të rrëzoni Qeverinë. Pasi u nënshkrua, thatë se do të krijoni një shumicë të re që do ta anulonte. Mund të filloni të fshiheni pas europianizmit përmes fushatës që keni nisur më 28 prill. Sot është mundësia që të listohen emrat e personave që janë pjesëmarrës në atë fushatë”, ishin fjalët e tij.
Iniciativa për rrëzimin e Qeverisë, e prezantuar nga Partia Demokratike Socialiste e presidentit të Malit të Zi, Milo Gjukanoviç, dhe disa parti të tjera, është shenjë pakënaqësie ndaj vendimit të Abazovicit për nënshkrimin e Marrëveshjes Themelore me Kishën Ortodokse Serbe.
