Paisja e përgjimit ka hyrë në Shqipëri në mënyrë ilegale ka thënë sot sekretari i Përgjithshëm i PD-së, Arben Ristani. Ai I referohet letrës së ish-drejtuesit të policisë italiane e cila konfirmon se paisja ka hyrë në Shqipëri ilegalisht. Ristani thotë se një paisje e tillë, gjurmimi e përgjimi, është ilegale kur futet pa u regjistruar në doganë, dhe është ilegale kur përdoret pa u vënë në dijeni dhe pa dhënë miratimin e tij Prokurori i Përgjithshëm.
“Fakti se paisja është futur në mënyrë të paligjshme tregon se ajo do të përdorej, sic është përdorur nga Saimir Tahiri në mënyrë të paligjshme.
Tahiri ka zgjedhur të tradhtojë të gjithë vartësit e tij që janë përlyer në këtë krim, duke thënë se nuk është përgjegjësi e tij. Pyesni policinë, thotë Tahiri. Pyesni doganat, thotë Tahiri. Kërkon të lajë duart ministri i brendshëm, kur gjithkush e di se paisja ka hyrë, është përdorur, me porosinë e tij dhe me dijeninë e Edi Ramës. Shihni kushtet e flagrancës ku janë kapur Tahiri e shefi i tij i policisë. Të dy thanë në fillim se një paisje e tillë nuk ekziston. Më vonë Tahiri e pranoi se pajisja ekziston.
Më pas Drejtori i Përgjitshëm i Policisë së Shtetit, Çako deklaroi në komisionin e sigurisë se pajisja nuk ekziston. Ndërkohë, ish drejtori i policisë italiane e hedh poshtë deklaratën e Cakos dhe thotë se pajisja ekziston, ka hyrë në Shqipëri dhe është përdorur”, tha Ristani.
