Sekretari i Përgjithshëm i Partisë Demokratike, Arben Ristani, publikoi sot disa materiale që sipas PD-së, janë fakte tronditëse për rolin e Saimir Tahirit dhe funksionarëve të emëruar prej tij, në kultivimin dhe trafikun ndërkombëtarë të drogës.
Ristani ka denoncuar rastin e drejtorit të Transportit në Sarandë, Klemend Balili, të cilin autoritetet greke dhe shërbimet e partnerëve ndërkombëtarë, e kanë cilësuar si një ndër kokat e një organizate kriminale të narkotrafikut. “Klemend Balili është konsideruar nga mediat greke si baroni i drogës apo “Escobari i Ballkanit”. Opozita e ka denoncuar që në vitin 2014 dhe konkretisht më 18 maj, kohë kur Edi Rama e emëroi drejtor të Transportit , si të lidhur me trafikun ndërkombëtar të drogës. Klemend Balili është arrestuar në korrikun e vitit 2006 me 750 kilogramë kanabis. Aksion i suksesshëm i policisë në atë kohë, pasi i arrestuari dyshohej se drejtonte një klan kriminal në Sarandë e përreth. Klemend Balili njihet për lidhjet e tij të forta politike dhe ka qenë sponsorizues i fushatës elektorale të PS në vitin 2013. Si lidhje të tij të drejtpërdrejta rezultojnë kushërinjtë e ministrit të Brendshëm, vëllezërit Habilaj, me të cilët ka bashkëpunuar për trafikim të lëndëve narkotike në vitet 2014-2016. Nëpërmjet vëllezërve Habilaj, Klemend Balilaj ka vendosur kontakt të drejtpërdrejt me ministrin e Brendshëm, Saimir Tahiri. Nga informacionet e brendshme të oficerëve me integritet në Policinë e Shtetit, partnerëve ndërkombëtarë, dhe strukturave të hetimit të specializuara në Shqipëri, që kanë hetuar shtetasin Klemend Balilaj,rezultojnë lidhje të tij të forta nëpërmjet ministrit të Brendshëm Saimir Tahiri me drejtues të lart të Policisë së Shtetit si më poshtë: Ish-drejtori i Forcave së Posaçme Operacionale, Albert Pata, drejtori i Policisë së Durrësit, Perlat Çullhaj, drejtori i Policisë Vlorë, Jaert Çelaj, drejtori i Policisë Gjirokastër, Aranit Arapi”, tha Ristani.
Sipas tij ish-drejtori i Kufirit në Vlorë, Kastriot Skënderi në vitin 2015 në zonën e Kakomesë u kap me një kamion me 1 ton lëndë narkotike e llojit kanabis sativa.
Sekretari i Përgjithshëm i PD-së tha se sesër do të publikohen të tjera fakte tronditëse të lidhjeve të ministrit të Brendshëm, Saimir Tahiri dhe funksionarëve të lartë të Policisë së Shtetit me trafikun ndërkombëtar të drogës.
