Vëzhguesi kryesor i zgjedhjeve OSBE/ODIR ka rrëzuar kërkesën e Partisë Demokratike për të realizuar në zgjedhjet e qershorit, votimin dhe numërimin elektronik. Gjithashtu OSBE/ODIR ka kundërshtuar edhe kërkesën e LSI, e cila ka propozuar listat e hapura për zgjedhjet e 2017-s.
“Koha e mbetur në dispozicion nuk është e mjaftueshme për të ndërmarrë ndryshime të thella në Kodin Elektoral. Katër çështje mund të trajtohen nga Komisioni i Posaçëm i Reformës Zgjedhore. Asnjëra nga këto katër çështje nuk ka të bëjë me kërkesat e PD-së apo LSI-së, lidhur votimin elektronik apo listat e hapura”, ka theksuar OSBE/ODIR.
“Është shume vonë për Komisionin e Reformës zgjedhore që të adresojë të gjitha çështjet e pazgjidhura dhe rekomandimet e mëparshme në përmirësim të legjislacionit zgjedhor”.
Megjithatë nuk është shumë vonë për të adresuar disa pika të rëndësishme përpara se të mbahen zgjedhjet parlamentare të 2017.
Këto pika duhet të përmirësohen pa rishikimin e plotë të ligjit. OSBE/ODIR u bën thirrje autoriteteve shqiptare dhe inkurajon që të shfrytëzojnë kohën e mbetur për të bërë disa përmirësime në legjislacionin zgjedhor para zgjedhjeve parlamentare të 2017.
