Publikohet dokumenti konfidencial midis Ministrisë së Financave dhe Kuvendit të Shqipërisë
Ministria e Financave nuk mund të mbulojë shpenzimet që kërkohen për pagat e gjyqtarëve referuara nga reforma në drejtësi. Një komumnikim midis Ministrisë së Financave me Kuvendin e Shqipërisë, publikuar nga gazeta Dita, vihet re se Ministria e Financave nuk është dakord me pagën e lartë për gjyqtarët e prokurorët që do t’i mbijetojnë vettingut.
Sipas propozimeve që referon reforma në drejtësi për statusin e njerëzve të drejtësisë, parashikohet që pagat për ta janë midis shumës 3 deri në 5 milion lekë të vjetra në muaj. “Pra nëse aplikohet skema që parashikon ligji bashkë me shtesat e vjetërsisë, paga bruto shkon mbi 500 mijë në muaj, dyfishi i rrogës më të lartë në Republikën e Shqipërisë”, thuhet ndër të tjera në materialin e MF.
Aktualisht, fondi për magjistratët është 1.8 miliardë lekë. Referuar këtyre të dhënave mbi pagën mujore të çdo magjistrati, të propozuar si më lart, rezulton se fondi i nevojshëm për paga dhe sigurimet e detyrueshme shkon në 4.5 miliardë lekë në vit, nga 1.8 miliardë që është aktualisht, ndërsa paga mesatare shkon nga 138 000 lekë/muaj në 330 000 lekë në muaj, pa përfshirë shtesën e pagës për vjetërsi”, thuhet në dokumentin konfidencial të Ministrisë së Financave.
