Raportuesi për Shqipërinë pranë Parlamentit Evropian Knut Flekenshtajn dhe Presidenti i Delegacionit për Europën Juglindore Eduard Kukan, kanë theksuar se, përpjekja për të zgjidhur çështjen e reformës në drejtësi nëpërmjet blerjes së votës është e paimagjinueshme në Parlamentin Europian .
Mesazhet e tyre janë përcjellë nga zyra e shtypit të PD dhe vinë në një kohë kur palët nuk po arrijnë konsensusin vetëm për një pikë të vetme të draftit, atë për vendet e rezervuara.
Eduard Kukan: “Blerja e votës nuk është një praktikë europiane dhe ne e refuzojmë kategorikisht atë në çdo shoqëri demokratike. Çdo përpjekje e tillë e ngjashme për të zgjidhur çështjen e një projekti kaq të rëndësishëm sikurse është reforma në drejtësi, nëpërmjet blerjes së votës, është thjeshtë e paimagjinueshme në Parlamentin Europian. Prandaj është e rëndësishme për të gjithë liderët politike të flasin dhe të gjejnë rrugët për të arritur një marrëveshje. Asnjë blerje vote dhe asnjë imponim i një pale mbi një tjetër nuk është rruga e duhur, por proçesi duhet të ketë mbështetjen e të gjitha forcave politike, sepse vetëm atëherë mund të sjellë progresin e qendrueshëm të një vendi”.
Knut Flekenshtajn: “Miratimi i reformës në drejtësi pa opozitën nuk shtrohet si çështje. Çështja shtrohet nëse ata e kanë mazhorancën për çka kërkohet dhe në dijeninë time kjo bëhet me 2/3 e votave për të ndryshuar Kushtetutën. Nëse i kanë këto vota është në rregull, por pa i blerë ato, pasi nëse votat blihen kjo është e papranueshme për këdo”.
