Gjermania ka paralajmëruar se, nëse reforma nuk do të miratohet më 21 korrik, Shqipëria mund të humbasë jo vetëm bisedimet por edhe statusin e vendit kandidat.
Kryetari i Komisionit për Çështjet Europiane në “Bundestag” u shpreh se, “ne vërtet ju kemi mbështetur, por nuk do të qëndrojmë gjithmonë pas shpinës tuaj. Tashmë do të na keni edhe përballë”.
“Durimi ynë nuk është i pafund. Ne nga ana jonë, Qeveria Federale, Bundestagu ju mbështesim në të gjitha çështjet dhe në këtë kuadër ju keni marrë statusin e vendit kandidat, por nëqoftëse ne, në fund të ditës na krijohet përshtypja që kjo reformë nuk është e dëshiruar, që lufta ndaj korrupsionit nuk funksionon ashtu siç duhet, atëherë edhe ne në fund të ditës të marrim vendimin që t’ju heqim statusin e vendit kandidat”, thotë Gunther Krichbaum.
Krichbaum ka vazhduar më tej duke e vënë theksin tek 21 korriku si datë vendimtare për reformën në drejtësi.
“Data 21 korrik është një datë vendimtare përsa i përket kësaj çështje sepse duhet marrë një vendim. Ajo që duhet të shmangim ne është që në fund fare Bashkimi Europian dhe natyrisht që opozita dhe qeveria duhet të ecin në të njëjtën udhë dhe të gjejnë një kompromis. Mendoj që të gjitha palët e përfshira të jenë të ndërgjegjshme për përgjegjësine që kanë në këtë rast”, thuhet në deklaratë.
