Ka shkuar në 35 numri i viktimave nga tërmeti shkatërrues i 24 janarit në Turqi. Nga tërmeti me magnitudë 6.8 ballë i shkallës Righter me epiqendër në qytetin Elazig, mbetën të plagosur mbi 1500 persona.
Presidenti i Turqisë Recep Tayyip Erdoğan me bashkëpunëtorë të tij ndodhet në qytetin ku ka qenë epiqendra dhe nga aty ndërsa theksoi se çdo formë e përkrahjes për të prekurit do të kalojë në Drejtorinë e Menaxhimit të Emergjencave dhe Gjysmëhënës së Kuqe të Turqisë, tha se nuk ka nevojë për ndihmë.
“Vendi ynë nuk ka nevojë për ndihmë. Por nëse dikush dëshiron të ndihmojë, ata mund ta bëjnë këtë përmes AFAD dhe Gjysmëhënës së Kuqe”, ka thënë Erdogan mes të tjerash.
Autoritetet vendase po vazhdojnë kërkimet për nxjerrjen e trupave që ndodhen nën rrënoja, duke shpresuar se mund të ketë të mbijetuar. Ky ishte tërmeti më i fuqishëm pas atij të vitit 1999, në të cilin 17 mijë persona humbën jetën.
