Kryedemokrati Lulzim Basha deklaroi se raporti i OSBE/ODIHR i publikuar këtë të mërkurë, e ka rrëzuar “farsën e 30 qershorit” në çdo aspekt.
Në një deklaratë për mediat mesditën e sotme, Basha tha se raporti tregon se 30 qershori ishte procesi më problematik dhe më i pandershëm i dy dekadave të fundit.
Basha tha se raporti konfirmon se votimet ishin antikushtetuese dhe se u mbajtën në shkelje të dekreteve të Presidentit
“Për të realizuar këtë farsë antikushtetuese dhe një partiake u shkelën ligjet dhe standardet zgjedhore. Në mënyrë të veçantë nga KQZ i cili portretizohet më shumë si organ partiak se sa si institucion i pavarur dhe i paanshëm kushtetues. I vetmi aspekt normal që ka gjetur raporti është që socialistët nuk janë rrahur me njëri-tjetrin në qendrat e votimit bosh. Pa hyrë në detaje dhe konstatime të qarta, dua të theksoj dy përfundimet kryesore të raportit:Votimet e 30 qershorit ishin antikushtetuese, të paligjshme dhe të pandershme; Votimet e 30 qershorit ishin një farsë moniste dhe e përfaqësimit politik dhe shkatërrim i demokracisë. Ndonëse jo objekt i vlerësimit të Raportit, tashmë është një e vërtetë e njohur botërisht është se: Në mënyrë të qëllimshme, kapjen e pushtetit vendor Edi Rama e ka bërë në bashkëpunim me kriminelë. Janë deri tani dy kandidatë për kryebashkiakë të vërtetuar me të shkuar kriminale dhe priten të tjerë.
Raporti i ODIHR është më shumë se raport zgjedhor. Ai nuk rrëzon vetëm votimet e 30 qershorit. Raporti ka rrëzuar të gjithë shtetin e Edi Ramës. Raporti nuk është vetëm autopsia e zgjedhjeve të vdekura të 30 qershorit Raporti është autopsia e kufomës së shtetit të së drejtës, e qeverisë së popullit dhe drejtësisë, të cilat janë vrarë nga Edi Rama për t’i zëvendësuar ato me një shtet privat, autokratik, kriminal dhe personal. Raporti tregon se në Shqipëri kushtetutë dhe ligj është vullneti personal i Edi Ramës, Raporti tregon se në Shqipëri shteti është vetëm një vegël në shërbim të vullnetit personal të Edi Ramës”, deklaroi Lulzim Basha.
https://www.facebook.com/lulzimbasha.al/videos/495353294531277/?t=290
