Presidenti Ilir Meta ka reaguar për raportin e Qendrës Evropiane të Drogave (EMCDDA), ku thotë se pandemia e Covid-19 nuk ka ndikuar në uljen e prodhimit të kanabisit, por ka vështirësuar trafikimin e tij nga vendet e prodhimit në vendet ku shitet.
Në këtë raport theksohet se kanabisi i prodhuar në Shqipëri është produkt që më pas shitet në tregjet europiane.
Ndërkohë Meta e cilëson këtë raport një këmbanë e fortë alarmi pasi sipas kreut të vendit, lufta kundër kanabisit është kusht për integrimin europian.
“Përqendrimi i Policisë së Shtetit, Shërbimit Informativ Shtetëror, Prokurorisë dhe agjencive ligjzbatuese në luftën kundër kanabisit është i domosdoshëm.
Raporti vjetor i Qendrës Europiane të Drogave i publikuar së fundmi, është një këmbanë e fortë alarmi që duhet të zgjojë dhe t’i bashkojë të gjitha forcat e përpjekjet për të mos lejuar kurrë më përsëritjen e këtij fenomeni kanceroz për shoqërinë, që aq shumë e ka dëmtuar imazhin e Shqipërisë.
Lufta kundër kanabisit është kusht për integrimin europian dhe çdo neglizhencë në këtë drejtim do kishte pasoja tepër të rënda për të ardhmen e vendit.” shkruan Meta.
