Kompania “GIF Albania” ka transferuar vetëm muajt e fundit rreth 1 milion euro drejt parajsave fiskale. Shuma është transferuar përmes 10 transaksioneve bankare të kryera vetëm gjatë vitit 2016.
Ky informacion ka dalë nga një raport prej 50 faqesh që Drejtoria e Përgjithshme e Parandalimit të Pastrimit të Parave ka referuar në polici gjatë muajit shkurt në lidhje me dyshimet mbi transaksionet e dyshimta të kompanisë “GFI”, e cila është koncesionaria e markimit të karburanteve në vend.
Transfertat janë raportuar nga bankat e nivelit të dytë në vend në Drejtorinë e Përgjithshme e Parandalimit të Pastrimit të Parave, bën të ditur “Report TV”.
Bazuar mbi këtë raport dhe disa veprime të tjera, policia ka referuar një kallëzim penal në Prokurorinë e Tiranës. Sipas policisë në raport janë identifikuar dy transferta, të mëdha, njëra me 400 dhe tjetra me rreth 500 mijë euro.
Po ashtu policia ka vërejtur edhe disa transferta të tjera më të vogla me nga 6- 7- 8 mijë euro, drejt vendeve të njohura si parajsa fiskale.
Edhe pse shuma më të vogla se shuma të dyshuara për nisjen e një hetimi për pastrim parash, transfertat vlerësohen të dyshimta, pasi ato janë nisur drejt parajsave fiskale të njohura si ishujt e Oqeanit Atlantik, apo të Paqësorit.
