Kryetari i Partisë për Drejtësi, Integrim dhe Unitet, Shpëtim Idrizi ishte i ftuar në Spotlight nga Alban Dudushi, prej ku ka rrëfyer se pse u prish aleanca me Partinë Socialiste në vitin 2017.
Idrizi deklaroi se 2017-ën nuk ishte PDIU ajo që iku nga Rama, por u përzu, duke nënkuptuar këtu mospërfshirjen e Çështjes Çame në programin qeverisës.
“E futi për herë të parë Çështjen Çame në programin qeverisës, jo vetëm të Partisë Socialiste në vitin 2013, gjë që nuk ekziston më në programin e qeverisë në vitin 2017. Pra, ne nuk kemi ik në 2017-ën, ne na përzunë, bashkë me çështjen çame. Dhe sigurisht që artikulimet e forta të z.Rama, na bënë që ne të ishim entuziastë dhe me thënë të drejtën bëmë dhe gjëra përpara. Eksperienca ime në politikë, po edhe në këto raste si kryetar i PDIU-së, më mësoi që të them këtë që sapo thashë: e duam PDIU-në, krah i duan votat e PDIU-së, por nuk e duan çështjen çame”, tha Idrizi.
Gjithashtu Idrizi deklaroi se Rama duhet t’i kërkojë falje komunitetit çam dhe të marr përgjegjësinë për mandatet e vjedhura prej tij.
“Mund të ketë një mundësi, në qoftë se Partia Demokratike nuk e do PDIU-në… Mund të ketë një mundësi..Që z.Rama të dalë në konferencë shtypi, s’ka rëndësi me mua apo pa mua, t’i kërkojë falje komunitetit çam, që i vodhi mandatet edhe i shiti kauzën… dhe sigurisht që kjo do të ishte një premisë për të diskutuar. Besoj që nuk do jemi ndonjëherë në këtë pikë, që z.Rama të dalë të kërkojë falje komunitetit çam dhe të marrë angazhimet, siç i mori në 2013-ën, madje me një angazhim publik, me zë, me figurë edhe me video që një herë në 6 muaj si kryeministër do raportonte në Parlamentin e Shqipërisë për çështjen çame”, deklaroi Idrizi.
