Kryeministri Edi Rama, ka reaguar për trenin me mbishkrime nacionaliste serbe i nisur drejt Kosovës. Në një postim të tij në facebook, Rama i është përgjigjur një komentuesi, pasi ai e kishte pyetur lidhur me këtë çështje.
“O Enver, po ku do futet Serbia o Enver?! Ka mbaruar ajo punë, Kosova është shtet, o mik, nuk është krahinë e Jugosllavisë e me Serbinë e lidh vetëm ndërtimi i të ardhmes së fqinjësisë mes dy shteteve, jo e shkuara rrënuese e serbomadhnisë! Serbia do ta vuajë atë të shkuar si makth deri kur ta njohë Kosovën dhe vetëm duke e njohur do të shpëtojë nga ai makth (që e shtyn hera – herës në marrëzira si kjo puna e trenit); ndërsa serbët e Beogradit në Kosovë, veç si turistë do të vijnë një ditë po si zot të vendit s’vijnë dot më kurrën e kurrës.Këto lojërat me trena e me aeroplanë janë manovra politike, për hesape politike, po hesapi i lirisë e pavarësisë së Kosovës është kry, Enver”, ishte përgjigja e Ramës.
