Në Kongresin e PBDNJ-së, kryeministri Edi Rama u ndal tek çështja e pronave dhe nevojës për reformën në drejtësi.
Rama: Nëse do të bënim një pyetësor në të gjithë Shqipërinë, shembujt do të ishin në 30 mijë. Një gjë është e sigurt: historia e pronës në këto 25 vite është historia më e pabesueshme për një shtet që është në mes të Evropës. Është ndërtuar mbi një Kushtetutë demokratike. Unë një shembull kam; i ka dalë pronari teatrit antik të Butrintit. Njësoj si t’i dalë pronari Akropolit në Athinë dhe qeveria të mos ketë të drejtën të hapë dyert e Akropolit për miliona njerëz.
Ka një familje që ka letra dhe që pretendon se është më antike se sa vet antikiteti. Çfarë të thuash më për pronat në Shqipëri dhe batërdinë e pronave. Dhe rasti kur shfaqen pronarë që nuk kanë asnjë provë për trungun e familjes së tyre dhe pa pritur e përkujtuar kthehen në posedues të qindra hektarëve është tregues i dhimbshëm dhe kuptimplotë i sistemit të drejtësisë.
Një sistem drejtësie që e ka kapur për fyti këtë vend, jo sot por që sot është bërë një sistem që kërcënon drejtpërdrejt liri dhe të drejta dhe që tregton në mënyrë të përditshme liri dhe të drejta. Sot jemi në kushtet kur duhet të bëjmë një zgjedhje shumë të qartë që në kuptimin tonë shkon përtej partive politike dhe që padrejtësisht komentohet sikur është një zgjedhje për fatin e politikanëve.
Çfarë do të ndodhë me politikanët në rast se do të kalojë reforma në drejtësi? Ndërkohë që pyetja është: çfarë do të ndodhë me problematikën e pronave, është problematikë qendrore për minoritetin në rast se nuk kalon reforma në drejtësi. Nuk besoj që ka një mendje të arsyeshme se po qe se nuk kalon reforma në drejtësi, gjendja do të ndryshojë për mirë. Ka rekorde me qindra seanca që nuk arrijnë dot të marrin pronën e tyre dhe që përballen me pronarë që disponojnë në mënyrë të drejtë tapitë mbi pronën e gjyshërve të tyre dhe me gjykatës që bëjnë pazar.
A mund të ndodh që të shkosh në gjykatë dhe të kërkosh një mollë dhe gjykatësi të jep tre mollë? Është një rast flagrant me një tjetër pronë dhe bëhet fjalë për qindra hektarë, ku subjekti i interesuar paraqitet në Gjykatë në mënyrë tërësisht të padrejtë bazuar mbi një manipulim dokumentesh duke pretenduar në një nga vendet më të bukura të bregdetit 50 hektarë që aktualisht janë pronë e shtetit dhe gjykatësi i jep 300 hektarë.
Arsyeja shumë e thjeshtë, sepse gjykatësi shfrytëzon padinë e subjekti dhe fton atë ta shtojë këtë pronë dhe pastaj t’i mos merr 50, por 150 dhe 150 të tjerat po i marr unë. Pyetja që bëj unë është: si mund të çmontohet ky sistem? Si mund të zmbrapset kjo hordhi prokurorësh dhe gjykatësish që kthyer në sipërmarrës që tregtojnë drejtësinë? A mund ta bëjnë partitë politike në Parlament? Unë mendoj se mund të jenë kontribuues.
