Kryeministri Edi Rama, ka deklaruar se Partia Demokratike është në rrugën e vetëvrasjes politike dhe mund të shpërbëhet.
Përmes komunikimit javor në Facebook, Rama i ka konsideruar kërkesat e PD-së si absurde, thotë se meraku i tij është bllokimi i reformës në drejtësid dhe jo vetëshkatërrimi i disa partive opozitare.
Pjesë nga fjala e Ramës:
Janë ngujuar në një çadër tallavaje nga ku kërkojnë qeveri teknike dhe kërcënojnë se nuk do hyjnë në zgjedhje. Ku është parë dhe ku është dëgjuar një budallalëk i tillë.
A ka marrë vallë kjo qeveri ndonjë masë shtrënguese që pengon rolin e opozitës, përkundrazi, opozita ka folur në këtë palament më shumë se gjatë gjithë historisë së saj. A ka marrë kjo qeveri ndonjë nismë të njëanshme që cënon votën e opozitës? Jo.
A ka ndodhur ndonjëherë që kur ju mbani mend që qeveria t’i thotë opozitës hajde kur të duash dhe do ta bëjmë si do ti mjafton që ndërkombëtarët të jenë dakort.
Në cilën fazë të historisë së demokracisë janë shtruar pyetje kaq absurde, sa të dëshpëruara aq edhe qesharake. Misioni i demokracisë nuk është të shpëtojë opozitën nga vetëvrasja, së bashku me zotin Nardi apo Vangjel. Mos të ketë askush asnjë merak se do mbetet Shqipëria pa opozitë po nuk erdhi Saliu me çetën e tij. Meraku ynë është bllokimi i reformës në drejtësi dhe alenaca e turpshme e PD me gjyqësorin e korruptuar.
Nuk di ndonjë opozitë tjetër në botë të ketë shfaqur këtë frikë nga reforma në drejtësi.
