Kryeministri Edi Rama foli në lidhje me kritikat që ka bërë në drejtim të BE-së, duke thënë se Bashkimi Europian duhet të kishte shpërndarë vaksina për Shqipërinë dhe vendet e rajonit.
Në konferencë për mediat, Rama nënvizoi se është një turp i madh për ata që mbrojnë BE-në nga ai.
“Ne kemi pasur shtet prej letre dhe ne po bëjmë transformim. Unë s’kam bërë asnjë sherr me BE-në. Mua nuk më ndalon askush të them opinionin tim. Por, mos u merrni me opinionin tim, por me opinionin e OBSH-së. Opozita dhe ambasada franceze nuk kanë të drejtë.Organizata Botërore e Shëndetësisë jep rekomandime për vaksinën. Ka thënë se jemi pranë një katastrofe morale për njerëzimin. Unë s’jam kaq i madh sa të flas ne emër të njerëzimit, por kam mendimin tim dhe si kryeministër dhe opinioni shqiptar mendon si unë. Ne nuk do rrimë me gojën mbyllur për fakte të qarta. S’jam kryeministër i një vendi të BE-së, por jam europian.
Turp i madh për ata që mbrojnë BE-në nga unë. Ata që nuk lënë fjalë vulgare pa përdorur ndaj ambasadorëve. Ata që i kanë bërë ambasadorët në sytë e opinionit si mos më keq, duke shkuar deri në ekstreme që janë neveri e gjallë, ata që nuk kanë lënë pa bërë maskarallëk për përfaqësuesit e BE-së këtu, e thonë këtë gjë. Nuk iu fus në sherr me BE-në, mos kini merak sa të jem unë këtu do jeni të mirë-përfaqësuar me BE-në dhe gjithçka tjetër”, përmbylli Rama.
