Protesta ka hyrë në ditën e saj të 15. Studentët kanë vendosur që edhe sot të bojkotojnë mësimin, ndërsa kanë lajmëruar që të mblidhen në orën 10:00 tek korpusi universitar.
Njëkohësisht në Fakultetin e Gjeologjisë dhe Shkencave Sociale po zhvillohen tryeza studentore bashkëbisedimi për të diskutuar ecurinë e aksionit të protestës. Një studente tha se kryeministri Rama nuk është i mirëpritur.
“Kjo është tryeza e dytë dhe organizohet nga vetë studentët. Edhe pedagogët janë të mirëpritur. Nëse Rama vjen në takimin tonë, do ta bojkotojmë, sepse ai nuk është i mirëpritur kurrë”, tha një studente.
Ndërkohë nuk ka një organizim nga studentët e Mjekësisë. Studentët e Shkencave Sociale do të nënshkruajnë një peticion që bojkoti në universitete të vazhdojë edhe pas festave.
Njoftimet në rrjetet sociale
“Aty ku nisi historia e arsimit Shqiptar. Aty per te vene me shpatulla pas murit te gjithe bashkefajtoret e ketij sistetemi Arsimor! Korpusi eshte godina e pare universitare e ngritur, pra perfaqeson UT nga e cila dolen te gjithe universitetet e tjera. Aty duhet te jemi te gjithe me te bashkuar se kurre per te cuar zerin tone ne veshin e te gjithe FAJTOREVE!”, thuhet në njoftimin e studentëve në rrjetet sociale.
Ndërkohë të tjerë studentë kanë lajmëruar se do të mblidhen në tryeza diskutimi, për të vendosur për ecurinë e aksionit të tyre. Njoftimet janë bërë në rrjetet sociale duke vendosur hashtagun “Rama nuk je i mirëpritur”.
http://www.oranews.tv/article/rama-nuk-je-i-mirepritur-sot-protesta-dhe-tryeza-studentore
