Ministerja e Integrimit Klajda Gjosha, deklaroi të kundërtën: asnjë mur kundrejt këtyre refugjatëve që kërkojnë të hyjnë në vendin tonë
Kryeministri Rama tha mbrëmë në “Top Story” se nuk mund të hapim kufinjtë për emigrantët sirianë. Ai sqaroi se Shqipëria nuk i ka kushtet për t’i hapur kufinjtë ndërkohë që të njëjtën gjë kanë bërë edhe vendet e tjera të rajonit. “Ne nuk kemi pse bëjmë një zgjedhje të ndryshme nga zgjedhja që bën vendet e Korridorit. Ne nuk do të hapim kufirin, s’kemi arsye ta bëjmë këtë gjë, sepse nuk kemi as kushtet, as fuqinë dhe as delirin që mund të shpëtojmë botën, ndërkohë që të tjerët mbyllin kufijtë, Serbia e mbyll, Maqedonia e mbyll, të vijnë tek ne?!”, u shpreh kryeministri Rama.
Për të njëjtën çështje, ministerja e Integrimit, Klajda Gjosha ka deklaruar të kundërtën. Ajo tha një ditë më parë se nuk do të nkëtë asnjë mur për refugjatët që vijnë nga Siria. Gjosha tha se në bashkëpunim me vendet e tjera të rajonit por kryesisht me Bashkimin Evropian, po pregatitet strategjia e pritjes së refugjatëve. “Duke mos ndërtuar asnjë mur kundrejt këtyre refugjatëve që kërkojnë të hyjnë në vendin tonë, ajo që është e rëndësishme, është që të ketë një bashkëpunim shumë të madh me të gjithë vendet fqinje, dhe në këtë rast me Greqinë por edhe me vendet anëtare të Bashkimit Europian, sepse ky duhet të jetë një projekt i përbashkët. Dua të theksoj sërish që të gjithë ata persona që presin të hyjnë në Shqipëri është mirë që të kenë një regjistrim të posaçëm dhe të identifikohen, kjo për arsye sigurie të vendit”.
