Kryeministri Edi Rama ka deklaruar se Partia Socialiste do të nisë rrugën pa Partinë Demokratike drejt zgjedhjeve të 18 qershorit.
Në komunikim e përjavshëm në ERTV Rama tha që opozita nuk e ka pasur kurrë mundëisnë e sotme ndërsa nuk e shfrytëzoi hapësirën e lënë nga mazhoranca për të gjetur një zgjidhje.
Deklarata e plotë e Ramës:
Sot do të zhvilloheshin zgjedhjet në Kavajë dhe ne u tërhoqëm për të derdhur njerëzit sheshit të Kavajës. I kemi propozuar PD-së një mekanizëm të ri institucional. Kurrë gjatë 15 proceseve zgjedhore, opozita nuk ka pasur mundësinë që ka sot.
Në pak orët e mbetura për të dëgjuar dhe për të vendosur bashkë me ne për të mirën e Shqipërisë, zor se do të dëgjojë. Fatkeqësisht, kohën e fituar nga tërheqja jonë nga Kavaja, PD nuk e shfrytëzoi për të hapur një faqe të re bashkëpunimi mes qeverisë dhe opozitës. E humbi këtë kohë të çmuar duke festuar një fitore imagjinare.
Përfundimi se në zgjedhjet e 18 qershorit po merr formë përfundimtare për shkak të verbërisë fatale të dy njerëzve në krye të saj, liderit të vjetër e hakmarrës që nuk e treti dot fare humbjen e rëndë të 4 viteve më parë dhe kryetarit të ri që imiton të vjetrin, por lider dot nuk bëhet.
Është për të ardhur keq, që dëshira, përpjekja dhe durimi ynë nuk mjaftoi sepse në fund fare frika nga drejtësia dhe humbja në zgjedhje që po rezulton fatale për PD-në, ne nuk ua heqim dot dy njerëzve që po sakrifikojnë një parti historike për interesat e tyre krejt personale.
As qeverinë nuk ua japim dot në tavolinë për t’i marrë me të mirë që të mos hedhin në erë PD-në. As zgjedhjet nuk ua shtymë dot se kështu u thotë mendja atyre që të mos destabilizojnë Shqipërinë. As shqiptarët nuk do t’i lëmë nën mëshirën e një lufte qorre për pushtet, duke u hequr të drejtën sovrane të zgjedhin ata vetë qeverinë dhe opozitën që duan për 4 vitet e ardhshme, sepse qeveria është vullnet i shumicës, jo plaçkë.
