Kreu i qeverisë Edi Rama ka mbajtur fjalën e tij në konferencën që po zhvillohet kundër korrupsionit. Ai është shprehur se lufta kundër korrupsionit në Shqipëri nisi me zbatimin e Reformës në Drejtësi.
“Vendete zhvilluara nuk janë imune ndaj korrupsionit sepse korrupsioni është si djalli që fle breda tek i gjalli. Është pjesë e jetës njerëzore, por vendet e zhvilluara kanë sisteme që e bëjnë tejet të vështirë penetrimim e korrupsionit dhe janë prova që nuk janë njerëzit që korruptojnë sistemin, por sistemi që i korrupton njerëzit. Kjo është një luftë për të ndërtuar sisteme imune. Mendoj që lufta kundër korrupsionit në Shqipëri për të ndërtuar sisteme ka nisur qëkur nisi Reforma në Drejtësi. Më parë lufta kundër korrupsionit ka qenë një luftë partizane me mullinjtë e erës. Fillimi i Reformës në Drejtësi dhe vazhdimi i saj janë baza për të pasur nesër një shtet modern”, deklaroi kryeministri.
Siç thekson ai nuk duhet të krijohen iluzione se nëse nuk ndëshkohen gjyqtarët dhe prokurorët nuk do të ketë goditje për zyrtarët e lartë.
“Shqipëria është ende në një proces rritje, është ende një shtet demokratik shumë i ri. Përtej të gjitha dobësive dhe atyre momenteve jo fort inkurajuese e tëra është historike dhe është garanci për Shqipërinë e fëmijëve tanë që nga këtu fillon e ardhmja e një shteti. E bardha do shkojë duke u zgjeruar dhe e zeza duke u zvogëlua. Është e domosdoshme që të vihet theksi që teksa vettingu bën kërdinë e duhur, nuk do të ketë goditje të korrupsionit në nivele të larta nëse nuk do të goditet korrupsioni i niveleve të larta brenda sistemit të drejtësisë. Nëse gjyqtarët dhe prokurorët nuk shkojnë prapa hekurave të mos kemi asnjë iluzion që kjo mund të ndodhë me zyrtarë të lartë. Nëse gjyqtarët janë duke bërë ndonjë krim në cenim të pronës me idenë se nuk e kalojnë vettingun, nuk do të shkojnë para drejtësisë, atëherë do të jetë e largët dita kur goditja do të ngjitet më lart. Kjo është premisa që duhet të fokusohet përpjekja. Kjo është premisa që SPAK do e bëjnë institucionin që të gjithë e kemi dasur. Përndryshe SPAK do të jetë zhgënjimi më i madh dhe goditja më e rënde morale që do i bëhet popullit shqiptar”, u shpreh Rama.
