Gjatë konferencës shkencore ndërkombëtare në Akademinë e Sigurisë, kryeministri Edi Rama ka paralajmëruar sot se kush është pasuruar nga veprimtari kriminale, nuk do t’i gëzojë ato pasuri.
Rama tha se në shënjestër të operacionit “Forca e Ligjit” do jenë asetet dhe burimet financiare të krimit.
“Vijimi i goditjeve ndaj grupeve kriminale vijon të mbetet prioritet i policisë. “Forca e Ligjit” është një ndërmarrje e rëndësishme e cila do synojnë katet më të larta dhe nyjet e thella të krimit të organizuar që për hir të së vërtetës për shumë vite kanë qenë larg fokusit të goditjeve të mirëfillta. Më e rëndësishme është shenjëstrimi i aseteve me origjinë kriminale, duke i zhveshur këto rrjete dhe këta elementë nga mundësia e rikthimit dhe duke bërë të mundur një mesazh shumë të qartë që kush përfiton nga krimi, nuk i gëzon ato që përfiton“, u shpreh Rama.
Kryeministri theksoi gjithashtu se pastrimi i Policisë së Shtetit nga punonjësit e korruptuar dhe të lidhur me grupet kriminale, do vijojë me vendosmëri falë Vettingut që pritet të nisë në muajin janar të 2018-ës.
