Kryeministri sqaron fyerjet për deputetët e opozitës në Kuvend
Kryeministri Rama korrigjoi fjalorin e tij të një dite më parë në debat me opozitën në Kuvend, ku deputetja e opozitës pretendoi se i tha kryeministri “monstër”. Rama e ka përgënjështruar këtë duke sqaruar se i ka thënë “motër”, ndërsa për batutën “gjinekologjike” të vezëve Rama tha se ishte për burrat e jo për gratë.
“Keqardhje për zonjën deputete që abuzohet nga partia e saj, me pretendimin se e quajta monstër kur në fakt i thashë motër! Këtë e dëgjuan të gjithë. E dëgjoi zonja e dëgjuan edhe burrat, që medemek u revoltuan nga humori im dhe qëlluan me vezë, a thua se vezët i pollën në sallë kur fola unë. Dhe pikërisht pse ata qëlluan me vezë (e jo zonja që kishte bërë një top me pako sheqeri të lagur). Replika “gjinekologjike” nuk ishte për zonjën, po për burrat vezëlëshues! Pasi bënë 24 orë të revoltuarit pa lidhje, kanë 24 orë që po bëjnë të fyerit pa lidhje. Të kesh në vend të opozitës qeverinë e vjetër, është fakt i trishtueshëm i jetës demokratike. Por të kesh përballë qeverinë e vjetër duke kaluar një ezaurim nervor, është edhe më keq. Eshtë e dhimbshme.”, shkruan Rama në rrjetet sociale.
