Ish-kryeministri Berisha i vetmi nga drejtues e ish-drejtues të politikës që nuk është ftuar në festën e socialistëve
“25 vjet prej themelimit të Partisë Socialiste, e bëjnë festën e ditëlindjes së këtij viti një moment të posaçëm ritakimi mes brezash, për të kremtuar së bashku arritjet dhe sfidat e familjes sonë të madhe politike. Me dëshirën që të ndajmë këtë moment të gëzuar së bashku, shpresoj të takohemi në ambientet e shtëpisë sonë në Tiranë. Vëllazërisht Edi Rama” – ky është teksti që Edi Rama ka përgatitur për të ftuar socialistët e të gjithë brezave në festën e vonuar të 25-vjetorit të partisë. Në këtë festë janë ftuar edhe të tjerë, jo socialistë. Është ftuar kryetari i PD-së Lulzim Basha e disa demokrat të tjerë por nuk është ftuar ish-kryeministri Sali Berisha.
Ftesa e PS-së iu është ndarë sot deputetëve të PS-së, LSI-së e PDIU-së, krerëve të partive parlamentare dhe partive aleate. Siç ishte paralajmëruar në festë është ftuar ish-kryetari i kësaj partie Fatos Nano, ish-presidenti Rexhep Meidani, dhe personalitete të tjera të PS-së ndër vite.
Si rrallë herë festa zhvillohet në ambientet pas godinës së PS-së, të martën e ardhshme në orën 19:00. PS lindi si parti e re ose më saktë e mori këtë emër më 12 qershor 1991, në kongresin e fundit të PPSH-së.
