Kryeministri Edi Rama gjatë takimit me fermerët e Elbasanit i nxiti keta të fundit të aplikojnë me projekte për të përfituar mbështetje nga Fondi Kombëtar i Garancisë.
Rama i njohu fermerët e Byshekut në Elbasan edhe me lehtësitë e krijuara për marrjen e titujve të pronësisë.
Rama:
Është një mundësi e jashtëzakonshme. Potencialisht mund të thithim deri në 300 milionë euro për ju nga bankat në tre vitet e ardhshme. Por nga ana tjetër kjo do të varet e gjitha nga puna që do të bëhet, sepse këto 300 milionë euro mund të thithen, por mund të mbetën aty, nëse ne nuk jemi aktivë me projekte dhe nëse ndërveprimi mes fermerëve, bashkisë dhe qeverisë nuk funksionon si duhet. Secili duhej të shkojë në njësinë administrative dhe vetëm të dorëzojë certifikatën familjare dhe aktin e marrjes në përdorim të tokës mbi bazë të ligjit 7501. Bashkia angazhon topografin, pra, paguajmë ne dhe jo ju, bëhen matjet, bëhet gati edhe harta e tokës, çohet në hipotekë dhe hipotekohet pa para dhe pa qenë nevoja për të qenë ju dhe bashkia ju dorëzon hipotekën në dorë në momentin e fundit kur duhet vënë firma.
Gjithashtu Kryeministri gjatë qëndrimit në Elbasan inaguroi dhe nisjen e punimeve për rregullimin e rrugës që të çon për në fshatin turistik të Byshekut. Gjatë inagurimit Rama shoqërohej edhe nga MinistrI i Shëndetësisë, ku sëbashku lançuan dhe projektin e shërbimit të urgjencës.
Rama:
Është një Urgjencë tërësisht e decentralizuar në kuptimin e territorit, pra, ka një shtrirje shumë më kapilare në territor dhe garanton një shërbim shumë më të shpejtë dhe një lehtësim të konsiderueshëm për personelin e spitaleve. Jam i bindur që brenda 5 muajve të ardhshëm do të jemi në një situatë tërësisht tjetër në Shërbimin Kombëtar të Urgjencës.
