Planifikimi i ministrisë së Ekonomisë: 83 mijë euro për regjistrin elektronik të PPP-ve
Krijon vetë problemin dhe pastaj hyn ta zgjidhësh, por me paratë publike ama. Ky është rasti i qeverive shqiptare të cilat në turravrapin për të dhënë koncensione kudo e kur të munden nuk kanë patur një inventar. Më në fund ministria e ekonomisë e ka gjetur zgjidhjen: do të harxhojë 83 mijë euro për të krijuar regjistrin elektronik për koncesionet. Eshte e qartë se deri më tani situata ka qënë dhe është jashtë kontrollit. Askush nuk është kujtuar të bëjë inventarin se sa koncesione janë dhënë, ku janë dhënë. E jo më të shikojnë nivelet e zbatimit të kontratave koncensionare, të cilat vec të ardhurave normale kanë edhe penelatitet përkatëse për cdo rast shkeljesh.
Por më në fund janë kujtuar. Në planet e Ministrisë së Ekonomisë është krijimi i një grupi pune. “Në fund të vitit 2016, ky grup pune do të vlerësojë risqet që rrjedhin nga aktivitetet e PPP-ve dhe kontratave koncesionare dhe nga detyrimet e prapambetura të njësive lokale dhe do të marrin në konsideratë nëse do t u duhet të përcaktojnë sasinë e këtyre risqeve në llogaritë e tyre fiskale” thuhet në Programin e Reformave të këtij viti të qeverisë. Ndërkohë sipas vlerësimit të FMN koncesionet janë një rrezik i madh fiskal.
