Ndryshime ligjore për përdorimin e parave në vitet zgjedhore
Qeveria ka vendosur të kufizojë veten në shpenzimet buxhetore dhe marrjen e borxheve, sidomos gjatë viteve elektorale. Ndryshimet ligjore që janë gati për të shkuar në Kuvend, përcaktojnë limitet e marrjes së borxheve por edhe mënyrën se si do të shpenzohen paratë e buxhetit në vitet kur ka zgjedhje. Sipas një prej amendimeve të miratuara në ligjin aktual të menaxhimit të buxhetit, qeveria vendos të kthejë mbrapsht praktikën e rritjes së borxhit publik pa një kufi maksimal. Sipas ndryshimit të propozuar në çdo ligj vjetor të buxhetit, si dhe në planifikimet e buxhetit afatmesëm, raporti i borxhit publik ndaj Produktit të Brendshëm Bruto duhet të planifikohet më i ulët se sa niveli i vlerësuar për vitin pararendës. Kjo do të bëhet deri atëherë kur niveli i borxhit të arrijë poshte 45 për qind të Produktit të Brendshëm Bruto.
Qeveria ka kaluar edhe një klauzolë tjetër që ka të bëjë me caktimin e një shpërndarjeje të detyruar proporcionale të shpenzimeve buxhetore në vitet kur ka zgjedhje. Në vitet kur ka zgjedhje të përgjithshme, ekzekutimi i buxhetit të qeverisjes së përgjithshme, përveç rasteve të jashtëzakonshme, do të kryhet: deri në fund të tremujorit të parë 30 për qind; deri në fund të gjashtëmujorit të parë 55 për qind dhe deri në fund të nëntëmujorit jo më pak se 80 për qind.
