Lëvizja Socialiste për Integrim, partnerja e PS për 4 vite qeverisje, tashmë në opozitë ka bërë publik reagimin e parë pas prezantimit të emrave të qeverisë “Rama 2”.
Ministrja e Integrimit në detyrë, Klajda Gjosha thotë se priste që Rama do ta niste punën me prioritetin madhor të Shqipërisë dhe shqiptarëve që është integrimi europian.
Ministrja e Integrimit ishte njëra nga ministritë që u shkri nga Rama, ndërsa kompetencat e saj duket se do t’i kalojnë ministrisë së Jashtme.
Statusi i plotë i Gjoshës
Mendova se sot qeveria e re do të niste me prioritetin madhor të Shqipërisë dhe shqiptarëve që është integrimi europian i vendit, me vizionin apo strategjinë se si Shqipëria do të shkojë drejt çeljes së negociatave.
Integrimi nuk është shpallja me zhurmë e qeverisë së re dhe as mbledhjet e Asambleve të partive politike, përkundrazi është një mori kriteresh, një koordinim i pafundëm procesesh e mbi të gjitha është seriozitet dhe respekt për institucionet dhe funksionimin e tyre.
Jam e bindur se Ministria e Integrimit do të atashohet diku në ndonjë cep të qeverisë por kurrë nuk kisha menduar se as nuk do të përmendej në fjalën e mbajtur sot mbi qeverinë e re!
Thua valle nuk është më prioritet? Uroj të jem gabim për sa kohë kemi fëmijë që rrisim në Shqipëri dhe ku e vetmja shpresë për një shtet funksional është pikerisht ky proces historik i vendit!
