“Gratë që e kanë burrin demokrat kokëshkretë që nuk ha pykë, atje te kutia e votimit, te vota e fshehtë të votojnë Shukriun. Burrat në punë të vet dhe gratë të shkojnë në drejtimin e duhur me Shukriun, vetëm në drejtimin e duhur.”
Kështu pati thënë kryetari i PS-së, Edi Rama, kur prezantoi në Dibër, Shukri Xhelilin si drejtimi i duhur për gratë vajzat dhe të gjithë dibranët. Një videoskandal i publikuar në Ora News hedh dritë mbi drejtimin e Ramës dhe Shukri Xhelilit. Ky i fundit shkëmbente vendet e punës për afera seksuale me vajzat e reja të Dibrës. Problemi nuk është Shukriu, sepse manjakë seksualë ka çdo shoqëri dhe ky nuk është fundi i botës. Por, fundi i Rilindjes është ama. Problem është kur këtyre monstrave u jep pushtet. Sepse Rama e ka zgjedhur Shukriun në krye të Dibrës dhe ia ka servirur dibranëve si drejtimi i duhur. Publikisht i ka bërë thirrje grave e vajzave të Dibrës të lënë burrat “kokëshkretë” në punë të vet e të shkojnë në drejtimin e duhur me Shukriun.
Problemi më i madh është tek përzgjedhja që ka bërë Rama për Dibrën dhe jo vetëm për Dibrën. Kur kërkoi një kandidat për Dibrën Edi Rama me siguri ka pyetur mirë se cili do të ishte më i miri për Rilindjen. Me siguri dikush i ka thënë se ky njeri ka një huq të madh që është maniak, sepse Dibra është aq e vogël sa të gjithë qytetarët e njohin njëri-tjetrin. Ka pak gjasa që huqi i madh i Shukriut të mos njihej ndër dibranë. Me siguri Rama e ka ditur një gjë të tillë, kur i bëri thirrje grave të lënë burrat e të shkojnë në drejtimin e duhur me Shukriun. Ky është problemi më i madh. Ky është turpi i Rilindjes dhe padyshim është faza e fundit e degradimit të saj. Kemi parë kriminelë që Rilindja i çoi në sallën e Kuvendit, kemi parë njerëz të akuzuar për vrasje e trafik droge të emëruar kudo në administratë, shpesh edhe në drejtim, kemi parë e po shohim manjakë seksualë të zgjedhur në krye të bashkive. Ata shfaqen në sytë e gjithë botës duke shitur vende pune me një natë seks në motele.
Sot, Edi Rama duhet të dorëzonte çelësat e kryeministrisë e me kokën ulur deri në tokë, të merrte me vete Rilindjen tij për t’i lënë rehat shqiptarët, sepse i ka privuar nga buka e gojës, i ka privuar nga të gjitha liritë dhe tani po i privon edhe nga dinjiteti. Dhe më e bukura është se thotë me plot gojën se për shqiptarët s’ka asnjë rrugë tjetër, veçse të falen te Rilindja, si e vetmja alternativë shpëtimi.
Ndoshta Edi Rama do të vazhdojë të qëndrojë në pushtet dhe me shumë gjasë do të qëndrojë se s’ka kush i merr çelësat e ndërtesës së qeverisë. Ndoshta do t’i fitojë edhe zgjedhjet e ardhshme parlamentare, sepse shqiptarët i ka marrë peng me bukën e gojës së fëmijëve të tyre. Porse kjo video e kryetarit të zgjedhur prej tij do të mbetet për shumë kohë një njollë e zezë ndër më të mëdhatë e Rilindjes së tij.
Turp për Edi Ramën! Turp për Rilindjen!
