Së fundmi zonja Dagmar Gietmann dhe zoti Florian Ilse, drejtuesit e Hotel Rogner kanë nisur një projekt për furnizimin me ilaçe dhe medikamente qendrat veterinare që merren kryesisht me kujdesin ndaj qenve. Ka një listë të gjatë të mënyrës se si ne shqiptarët sillemi me kafshët. Në fakt është një sfidë dhe do mbetet e tillë. Nis që nga viti 1913 “kujdesi” për kafshët. Gazetari dhe studiuesi Armand Plaka sjell një dokument shume interesant ku flitet për një rregullore të mënyres se si duhet te silleshim me qentë e rrugëve të Shkodrës së vitit 1913. Studiuesi sjell dokumentin e rrallë dhe këndvështrimin e tij për këtë sfidë 100 vjeçare të sjelljes me kafshët.
Nga Armand Plaka
Duket vërtetë luks të diskutosh sot për problemin e qenve të rrugës e trajtimin e kafshëve, ndërsa numërohen me qindra sfidat e problemet që kemi përpara për zgjidhje. Sidoqoftë, një urdhëresë e Bashkisë së Shkodrës ( në atë kohë kish nisur të thirrej Përlimtare, emër që e mbajti deri në vitin 1920 ) e 22 majit të vitit 1913, për trajtimin adekuat të qenve të rrugës për të mos shkaktuar probleme në qytet, më ngacmoi të sjell në vëmendje të gjitha iniciativat e shkuara e aktuale të Bashkisë së qytetit tim, Tiranës, e të mbarë bashkive shqiptare, në lidhje me zgjidhjen e këtij problemi.
E hedhur në tregun politik gjatë fushatës së fundmit për zgjedhjet vendore në kryeqytet (përpos atyre të paraardhësve që dështuan po ashtu me sukses të plotë), ajo përmbante dhe “inkastrimin” apo trajtimin më human të këtij problemi,( që sidoqoftë do çonte në zgjidhjen e tij), më rezulton se nuk po jep rezultatet e duhura. Qentë e rrugës, por edhe ata të “shtëpisë”, me afrimin e stinës së nxehtë kanë tendenca që u përafrohen ( pasi sigurisht se nuk kanë shanc t’i konkurrojnë dot realisht në këtë drejtim) shumë atyre të politikanëve tanë në periudha të nxehta zgjedhore, kur kafshimet, kacafytjet ndaj njëri-tjetrit e madje edhe brenda familjes, por edhe grykësia e pafré në ndarjen e presë, njohin shtim të dukshëm.
Sidoqoftë, faksimilja e marrë nga Arkiva e Bashkisë së Shkodrës, në shumë aspekte m’u duk një prurje interesante për t’a ndarë me ju miq të dashur të angazhuar apo jo politikisht, përsa kohë që akoma dëgjojmë se një qen kafshoi një fëmijë gjatë shëtitjes nga parku i Liqenit, apo se një grup të rinjsh argëtohen duke i lënë qentë e tyre të racave nga më agresivet që njeh shkenca, të shqyhen me njëri-tjetrin, apo se si hakmarrje, një baba qëllon me çifte qenin e fqinjit, pasi ky i fundit nga “pakujdesia” e të zotit, i kishte kafshuar për vdekje të bijën etj. Por më keq duket situata me qentë e rrugës, të cilët bashkë me njerëzit, gërmojnë vazhdimisht nëpër kazanë plehrash, duke përhapur sëmundje e shpesh ankth, çka jo thjesht si konstatim praktik, fatkeqësisht nuk përkon me asnjë periudhë historike të Shqipërisë, sado e varfër që ka qenë.
Marrë nga profili në Facebook i studiuesit dhe gazetarit Armand Plaka
