Fëmijët e klasës së parë mund të mos e kenë Abetaren në ditën e parë të shkollës, por ama ata që kanë ditëlindjen atë ditë, do ta kenë një surprizë nga kryeministri. Edhe nxënësit e klasave të tjera që e kanë ditëlindjen atë ditë të nisjes së viti të ri shkollor, do ta kenë këtë surprizë. Në vijimësi të propagandës, kryeministri ka zgjedhur kësaj here një detaj interesant sipas tij e stafit që e sygjeron. Opinion.al shkruan se Rama do t’i bëjë një dhuratë të papritur fëmijëve që kanë ditëlindjen pikërisht më 13 shtator, kur nis dita e parë e shkollës.
Dy janë problemet në këtë surprizë që ka menduar kryeministri për ditën e parë të shkollës. Ata që do ta kenë këtë fat, do të gëzojnë nga surpriza e kryeministrit, sigurisht se janë fëmijë. Po të tjerët?! Do rrinë të shohin shokët e tyre?
Problemi i dytë është se më shumë sesa për surpriza të tilla, nxënësit e shkollave shqiptare kanë nevojë që tekstet t’i kenë në kohën e duhur dhe ambjentet e përshtatshme, ku të zhvillojnë normalisht mësimin. Shumë prej tyre mund të mos i kenë tekstet për të nisur mbarë vitin e ri shkollor e shumë prej tyre nuk do të kenë as godina për të mësuar. Do të jenë të detyruar si çdo vit të presin lirimin e klasave në shkollat ekzistuese për të bërë mësim natën. Nuk ka ende shkolla ku të gjithë fëmijët e Shqipërisë të zhvillojnë normalisht mësimin.
Më shumë se për surpriza të tilla, fëmijët kanë nevojë të kenë mësues të kualifikuar për të marrë dijet e duhura e jo militantë partish që pasioni i tyre jo në çdo rast është mësimdhënia, por veçse rendja pas partisë e përfitimeve që merr si militant. Ndonjëherë pasioni i tyre është edhe dhuna ndaj nxënësve. Kjo është një dukuri e hasur shpesh në radhët e arsimtarëve shqiptare. Mediat kanë publikuar dhjetra raste.
Kryeministri dhe stafi i tij duhet të ndalin në këtë revansh propagande, sepse nuk mund të pretendojnë se do të vazhdojnë ta ushqejnë më publikun edhe pas tri vitesh qeverisje. Për tri vite nuk ka ndryshuar asgjë në arsim. Janë ndërtuar shumë pak shkolla, nuk janë përmirësuar, madje janë përkeqësuar tesktet shkollore. Ato nuk mbërrijnë në kohë në duart e fëmijëve, stafi petagogjik është në nivel të ulët professional, ndërkohë që korrupsioni bën kërdinë në arsim me emërimet e mësuesve përkundrejt rryshfetit. Ky është perceptimi që kanë qytetarët për arsimin dhe nuk ka propagandë që e mund, as surprizat e kryeministrit.
