Një betejë e re për reformën në drejtësi duket se do shfaqet shpejt. Koha e miratimit të shtatë ligjeve po sjell një ngërç të ri në procesin e reformës në drejtësi
Duket se do të ketë një betejë të re, e cila e rikthen në pikën zero problemin e reformës në drejtësi. Emiljano Aleksi, këshilltari për mediat i kryetarit të Kuvendit, Ilir Meta, ka lajmëruar ndërprerjen e vizitës zyrtare të shefit të tij në SHBA për t’u kthyer në Shqipëri, pasi konsensusi për reformën në drejtësi është rrezikuar.
Përmes një njoftimi në facebook, Aleksi njofton se Meta është nisur nga SHBA drejt Shqipërisë duke lënë në mes vizitën, sepse qarqe të caktuara janë sipas tij të interesuara të prishin konsensusin për reformën në drejtësi
“Kryetari i Kuvendit, z. Ilir Meta, ndërpret vizitën e tij në Shtetet e Bashkuara të Amerikës për t’u kthyer në Shqipëri dhe për të sqaruar konfuzionin e krijuar ditëve të fundit që kanë për qëllim prishjen e konsensusit historik parlamentar të 21 korrikut për reformën në drejtësi.”
Problematika lidhet me kohën e miratimit të shtatë ligjeve të reformës në drejtësi. Mazhoranca dhe opozita e kishte vendosur shtyrjen e miratimit të tyre për në shtator, por ka qenë BE dhe SHBA që kanë kërkuar miratimin e tyre tani, në këtë sesion legjislativ të Kuvendit me qëllim që të mos vonohet zbatimi i reformës në drejtësi.
