Një libër për fëmijë dhe adoleshentë është libri i fundit i shkrimtarit Zija Çela. Një përmbledhje me 33 tregime titulluar “Princi i Buzëqeshjes” të cilin autori e promovoi në ditën e 70 –vjetorit mes miqsh dhe kolegësh , i cili vjen si një letërsi për të gjithë ata që e kanë fëmijën brenda vetes.
Shkodra e 60 viteve më parë në sytë e një djali 10 –vjeçar që lëngon i sëmurë në shtrat pa mundur të shkojë në shkollë. Ajo që i kërkon së ëmës i vogli i shtatë fëmijëve që rritet në një familje të varfër ku buka e përditshme është e pakët ndërsa ushqimi i marrë përmes librave mungon fare e habit edhe atë vetë. “I kërkova nanës libra” – kujton shkrimtari në ditën kur kalendari i shënon përvjetorin e shtatëdhjetë të jetës, ndërsa kujtesa luan me të sikur ajo ndodhi të ishte e freskët nga e djeshmja. “Ajo kërkoi në trastën e leckës, por unë i thashë nuk du’ librat e shkoll’s. Nana doli nëpër kojshi e më solli dy libra, e nji prej tynet ishte “Princi i Lumtur” i Oscar Wilde-it”.
Qe i pari libër që lexoi në jetën e tij, përtej teksteve shkollore e që sot shkrimtari shqiptar Zija Çela e merr si një shenjë, si e shkruar që pikërisht në këtë kohë ai do të shkruante një libër, të cilin do ta titullonte “Princi i Buzëqeshjes”.
Është ky libri më i ri i Çelës, i cili u promovua ditën e djeshme në mjediset e Muzeut Historik Kombëtar në një ditë që përkonte me ditëlindjen e tij të shtatëdhjetë, një përvjetor që shkrimtari e ndan me të shoqen, Aliqin, edhe ajo e lindur në të njëjtën ditë. Miq, kolegë, dashamirë të letërsisë, njerëz të medias e akademikë ishin mbledhur për të uruar shkrimtarin për ditëlindjen si edhe për librin e tij më të ri, i cili vjen i botuar nga shtëpia botuese “Toena”. Shkrimtari Bardhyl Londo e cilësoi këtë libër si të shkruar për të gjithë ata nga mosha pesë deri në njëqind vjeç , duke shtuar se librat e kushtuar fëmijëve apo adoleshentëve janë ata libra që njeriu u kthehet me mall në çdo lloj moshe.
