Media të ndryshme ndërkombëtare i kanë dedikuar shkrime bukurisë së qyteteve shqiptare. Këtë herë në qendër të vëmendjes është Tirana dhe media prestigjioze që ka vizituar Shqipërinë është Vanity Fair.
“Tirana nuk ndalet për asnjë moment. Është kjo ndjesia që ke kur ecën rrugëve të qytetit shqiptar. Kantierë, makineri, arkitektë dhe punëtorë, të gjithë të angazhuar për të rindërtuar qytetin. Një nga projektet e rindërtuara është sheshi në të cilin ka pemë dhe gurë nga i gjithë vendi, por edhe nga Kosova. Arkitekti italian Gherardo Bosio ka projektuar qendrën aktuale të Tiranës në vitin 1939 dhe tashmë përsëri një tjetër italian i besohet projekti për një kryeqytet më ekologjik”, shkruhet në artikull.
Vanity Fair vijon më tej duke përmendur Bunk’Art 2 dhe risitë kulinare, ku nënvizon “Mullixhiun”, si një restorant sa modern dhe cilësor që përdor vetëm përbërës që vijnë nga “Mrizi i Zanave”.
“Në mars të vitit të kaluar u përurua Pazari i Ri, i cili transfprmoi një zonë të braktisur në një nga vendet më të frekuentuara nga turistët. Kështu edhe Tirana ka një treg europian që të kujton “Boqueria”-an e famshme në Barcelonë. Pazari i Ri është vendi ideal për t’u çlodhur dhe për të bërë blerje interesante ( djathëra absolutisht lokale, gjizë që përdoret për byrek, një pjatë tipike e përhapur në të gjithë zonën e Ballkanit). Pas një pazari të shëndetshëm, ia vlen të ndalesh për një drekë te Oda, restoranti i vetëm i Tiranës ku mund të shijosh kuzhinën autentike tradicionale”, thuhet në shkrim.
Një hapësirë i kushtohet edhe jetës së natës…”Tirana nuk fle kurrë…Nëse jeni në kërkim të argëtimit atëherë zgjidhni Bllokun. Lagjia e dikurshme e rezervuar vetëm për nomenklaturën komuniste është sot zona më “cool” në Tiranë. Vizitoni lokale si Radio, Nouvelle Vague, Colonial për të shijuar një kafe, birrë apo kokteil. Megjithatë e gjithë lagjja meriton t’i hidhni një sy. “Komiteti, një kafene e fshehur pas Piramidës është një tjetër vend që duhet vizituar”, vijon më tej artikulli.
Shkrimi mbyllet duke u shpjeguar turistëve se ciliat janë linjat ajrore me të cilat turistët mund të udhëtojnë drejt Tiranës dhe vendndodhjen e hoteleve sa më pranë atraksioneve turistike.
