Pas refuzimit të Skënder Gjinushit si kryetar i Akademisë së Shkencave nga ana e presidentit të Republikës Ilir Meta, ka reaguar edhe gazetari Mentor Kikia.
“Një refuzim dinjitoz i presidentit Ilir Meta”– shkruan Kikia.
Sipas tij ky veprim është i drejtë pasi zgjedhja e një politikani karriere, ndërsa kishte ende emrin në KQZ si pjesëmarrës në zgjedhjet vendore, është një turp për Akademinë e Shkencave, një turp për botën akademike në tërësi dhe një turp për të gjithë shoqërinë.
Postimi i plotë:
Një refuzim dinjitoz i presidentit Ilir Meta
Presidenti Ilir Meta nuk e dekreton Skënder Gjinushin si kryetar të Akademisë së Shkencave.
Pavarësisht arsyeve që ka apo që mund të ketë, ky është një veprim i drejtë. Zgjedhja e një politikani karriere, ndërsa kishte ende emrin në KQZ si pjesëmarrës në zgjedhjet vendore, është një turp për Akademinë e Shkencave, një turp për botën akademike në tërësi dhe një turp për të gjithë shoqërinë. Akademia e Shkencave nuk është ministri, ku titullari është post politik. Kreu i Akademisë së Shkencave duhet të jetë një figurë elitare e shoqërisë, duhet të personifikojë jo vetëm studiuesin dhe akademikun, por edhe personalitetin e padiskutueshëm publik.
