Kreu i grupit parlamentar të LSI, Petrit Vasili tha se LSI ka ridepozituar padinë ndaj Edi Ramës në Gjykatën e Lartë për thirrjet e tij gjatë fushatës elektorale, ku i kërkoi policisë të dilte në zgjedhje.
“Ne kemi bërë padi ndaj shtetasit Edi Rama ku ai i ka bërë thirrje policisë për të dalë në fushatë. Ne e kemi ridepozituar padinë në Gjykatën e Lartë. Pse e kemi ridepozituar në Gjykatën e Lartë? E kemi bërë, pasi Prokuroria e shqyrtoi çështjen në më pak se 2 javë. Prokuroria thotë se lidhur me deklaratën e kryeministrit, ai shfajësohet me një status falje në Facebook. Kjo është njësoj sikur të vrasësh dhe të thuash më fal.
Në lidhje me rinisjen e sesionit parlamentar të Kuvendit në datë 15 janar, LSI konfirmon pjesëmarrjen. Kemi dëgjuar një maskaradë të PS lidhur me dëshirën e tyre për reformën në drejtësi. Ju them se e vetmja forcë politike që nuk e do reformën në drejtësi është Rilindja. LSI ka qenë promovuese e konsensusit për reformën në drejtësi. Integrimin e pengon kapja e drejtësisë”, tha Vasili.
