Policia e Shtetit ka dhënë detaje të reja në lidhje me arrestimin e këngëtarit të njohur Aleksandër Gjoka i cili u ndalua mbrëmjen e djeshme nga policia.
Mësohet se arrestimi është bërë rreth orës 00:15 minuta, në rrugën “Sotir Caci” duke drejtuar një mjet tip “Chevrolet” në gjendje të dehur.
Sipas njoftimit, Aleksandër Gjoka është testuar nga shërbimet e Policisë Rrugore me aparatin “Drager” për të verifikuar nëse ishte i dehur apo jo, dhe ka rezultuar se këngëtari ka qenë nën efektin e alkoolit, në masën 0,66 mg/l, mbi normat e lejuara.
“Pas testimit me aparat “Drager”, nga shërbimet e Policisë Rrugore rezultoi se shtetasi A. Gj., 60 vjeç, banues në Tiranë, drejtonte mjetin në gjendje të dehur në masën 0.66 mg/l”, thuhet në njoftim, ndërsa materialet i kanë kaluar tashmë Prokurorisë Tiranë, për veprën penale “Drejtimi i automjeteve në mënyrë të parregullt”.
