Policia e shtetit ka shpërndarë disa foto nga aksioni i zhvilluar në zonat e Pukës, ku tregohet sesi ruhen parcelat me kanabis nga kultivuesit. Nga fotot dallohet qartë që kultivuesit kanë ngritur çadra pranë parcelave të mbjella me lëndën narkotike si dhe janë të pajisur edhe me armë kallashnikov.
Operacioni “Pisha e Zezë”– Operacioni i koduar “Pisha e Zezë” është zhvilluar në disa zona të Pukës, kryesisht në vendet e quajtura “Lugina e Seftes” në fshatin Dom, si dhe në fshatin Mushte dhe Srriqe. Kështu, gjatë operacionit të zhvilluar në vendin e “Lugina e Seftes” fshati Dom janë kostatuar në 6 parcela 1060 bimë të dyshuara cannabis – sattiva.
Në fshatin Mushtë janë gjetur 640 degë bimësh të dyshuara narkotike në gjendje gjysëm të thara, si dhe 59.185 kg boçe të kësaj bime. U identifikuan autorët e dyshuar si dhe u shpallën në kërkim, konkretisht shtetasit:
– Zef Gjergji, 56 vjec, banues në Lezhë,
-Fran Frroku, 49 vjec, banues në Lezhë.
Në vijim të veprimeve policore në fshatin Srriqe të Njesisë Administrative Qafë -Mali, Fushë – Arrëz, gjatë kontrollit janë konstatuar në 5 parcela 3686 bimë të dyshuara cannabis – sattiva.
Gjithashtu gjatë kontrollit të ushtruar u gjeten dhe u sekuestruan në cilësinë e provës materiale edhe 2 armë zjarri automatik mod-56, -2 aparate telefoni celular. Nga veprimet hetimore të kryera, rezulton se autor i dyshuar i kultivimit është shtetasi B. P. 61 vjeç, banues në Dukagjin i Ri , i cili u shpall në kërkim.
Prokuroria e Pukës po heton më tej për rastet.
